डॉ. पंजाबराव देशमुख कृषी विद्यापीठात ‘अॅग्रोटेक–२०२५’ राज्यस्तरीय कृषी प्रदर्शनाचे आयोजन

डॉ. पंजाबराव देशमुख कृषी विद्यापीठात ‘अॅग्रोटेक–२०२५’ राज्यस्तरीय कृषी प्रदर्शनाचे आयोजन

अकोला :

शेतकऱ्यांच्या सर्वांगीण विकासासाठी आणि आधुनिक कृषी तंत्रज्ञानाचा प्रचार-प्रसार करण्याच्या उद्देशाने डॉ. पंजाबराव देशमुख कृषी विद्यापीठ, अकोला येथे ‘अॅग्रोटेक–२०२५’ या राज्यस्तरीय भव्य कृषी प्रदर्शनाचे आयोजन करण्यात आले आहे. हे प्रदर्शन दि. २७ डिसेंबर २०२५ ते २९ डिसेंबर २०२५ या कालावधीत विद्यापीठ क्रीडांगण, नागपूर रोड, अकोला येथे होणार आहे.

डॉ. पंजाबराव देशमुख कृषी विद्यापीठ, महाराष्ट्र शासनाचा कृषी विभाग तसेच आत्मा, अकोला यांच्या संयुक्त विद्यमाने या प्रदर्शनाचे आयोजन करण्यात आले आहे. शेतकऱ्यांच्या उत्पन्नात वाढ होण्यासाठी नविन संशोधन, आधुनिक शेती पद्धती, कृषी अवजारे, तंत्रज्ञान व योजनांची माहिती एकाच ठिकाणी उपलब्ध करून देणे हा या प्रदर्शनाचा मुख्य उद्देश आहे.

या कृषी प्रदर्शनात विद्यापीठ व संलग्न कृषी संस्थांचे दालने, कृषी विभागाची दालने, मत्स्यव्यवसाय विकास विभाग, पशुसंवर्धन व दुग्ध व्यवसाय विकास विभाग, कृषी व ग्रामीण उद्योग दालने, बचत गटांचा सहभाग तसेच फुले, फळे व भाजीपाला प्रदर्शनाचे आयोजन करण्यात आले आहे. यासोबतच कृषी औजारे व उत्पादनांची दालने, ग्रामीण व्यवसाय उत्पादने, विद्यापीठ प्रकाशने आणि शेतकऱ्यांसाठी विविध विषयांवर तज्ज्ञ मार्गदर्शन सत्रेही आयोजित केली जाणार आहेत.

शेतकऱ्यांनी या संधीचा लाभ घ्यावा व आधुनिक, शाश्वत आणि उत्पन्नवाढीच्या शेतीकडे वाटचाल करावी, असे आवाहन आयोजकांकडून करण्यात आले आहे.